പരിണാമം

1

ആയിരത്തൊന്നു കഥകളുമായി
ഇടനിലക്കഴുകന്മാർ.
നാട്ടുമാക്കാന്മാരുടെ 

വറചട്ടിയിൽ നിന്ന്
 കുടുംബത്തിനു  വിടുതലൈ !
 തലപുകക്കാതെ  നേർച്ചക്കോഴികൾ
പത്തേമാരികേറി  

പേർഷ്യൻ അഗ്നിയിൽ വേവാനെത്തി .

1A

വെള്ളക്കുപ്പായമിട്ട നാട്ടുമാക്കാന്മാർ 

വെള്ളിവെളിച്ചത്തിൽ 

നേർച്ചക്കോഴികളെ വാഴ്‌ത്തിപ്പാടി.
കൊക്കക്കോ  സിന്ദാബാദ് 

വെന്തുപാതിയായ ഒരു  നേർച്ചക്കോഴി
ചീ മുട്ട വലിച്ചെറിഞ്ഞു.

2

ചൂടറിയാത്ത പിൻ  തലമുറ 

ബോർഡിംഗ്  സ്കൂളിൻറെ അരണ്ടവെളിച്ചത്തിൽ  

വെളുത്തുതുടുത്ത്  തടിച്ചു കൊഴുത്ത് 

ബ്ബ്രോയിലർ കോഴികളായി വിരിഞ്ഞിറങ്ങി .

താടി വളർന്നിട്ടും 

പറക്കമുറ്റാതിരുന്ന കുഞ്ഞുങ്ങളെ

പേർഷ്യൻ പിതാക്കന്മാർ
ചുമലിലേറ്റി കൂടെ കൂട്ടി .

ഗൾഫിന്റെ ഗ്രിൽ അടുപ്പിൽ 

ചുറ്റിത്തിരിഞ്ഞ അവ 

തീൻമേശയിൽ എല്ലില്ലായ്മയുടെ 

പുതു രുചിപകർന്നു .

2A

വെള്ളക്കുപ്പായമിട്ട കുറുക്കന്മാർ

നീലവെളിച്ചത്തിൽ

ബ്രോയിലർ മാഹാത്മ്യം പാടിക്കൂവി.
കരിഞ്ഞുതീരാറായ 

ഒരു ബ്രോയിലർകോഴി

മുക്കി മുക്കി  ഇട്ട മുട്ട

താഴെ വീണു പൊട്ടി

ചിരി പടർത്തി .

 3
കെന്റുക്കി സായിപ്പിന്റെ 

ജനിതക പരീക്ഷണശാലയിൽ 

തലയും കൊക്കും
കയ്യും കാലുമില്ലാതെ 

അനന്തര തലമുറ 

ഉരുളക്കിഴങ്ങ് വറുത്തതിനു 

കൂട്ടായി .

3A
അരണ്ട ചുവന്ന വെളിച്ചത്തിൽ 

വെള്ളത്തോലിട്ട ചെന്നായ്ക്കൾ

കൂട്ടമായി വന്ന്

നാടിനു നന്മ എന്ന് ഓരിയിട്ടുകൊണ്ടിരുന്നു.

കരയാൻ പോലുമാകാതെ 
പുതുതലമുറ 

വെജിറ്റബിൾ സ്റ്റേജിൽ.